Маданият маркази биносининг таъмирталаблиги хусусидаги пост юзасидан расмий муносабат

Бугун фейзбук ижтимоий тармоғида Янгиобод туманидаги Маданият маркази таъмирталаблиги ва таъмирлаш ишлари бошланмаётгани тўғрисида пост жойлаштирилган. Мазкур ҳолат юзасидан шуни маълум қиламизки, аввал ҳам тушунтириш берганимиздек, Ўзбекистон Республикаси Вазирлар Маҳкамасининг 2013 йил 25 июндаги 178-сонли қарорига асосан Янгиобод тумани Маданият маркази биносини 2015 йилда маҳаллий бюджет маблағлари ҳисобидан таъмирлаш режалаштирилган бўлиб, қурилиш-таъмирлаш ишлари бошланган. Ушбу марказни қурилиш ишлари учун молиялаштириш манбалари ҳал этилмаганлиги сабабли, таъмирлаш ишлари тўхтаб қолган.

Ушбу ҳолатга туман раҳбарлари ва мутасаддилар бефарқ бўлмаган ҳолда бир неча маротаба туман ҳокими, вилоят ҳокимлиги ҳамда вилоят Кенгаши депутати томонидан Ўзбекистон Республикаси Маданият вазирлигига Янгиобод туманида ягона бўлган Маданият маркази биносини таъмирлашда амалий ёрдам сўраб мурожаатлар қилинган.

Мазкур мурожаатлар юзасидан Ўзбекистон Республикаси Маданият Вазирлиги томонидан маълум қилиндики, Ўзбекистон Республикаси Президентининг 2018 йил 28 ноябрдаги ПҚ-4038-сон қарорининг 4-иловасида 2019-2022 йилларда янги қуриладиган, реконструкция қилинадиган, капитал таъмирланадиган ва жиҳозланадиган маданият марказларининг манзилли рўйхатида Янгиобод туман Маданият маркази 2022 йил капитал таъмирланиши кўзда тутилган. Шунингдек, туман Маданият марказининг томоша залини 300 дона юмшоқ ўриндиқлар билан таъминланиши маълум қилинган.

Бугунги кунда туман раҳбари ва мутасаддиларнинг саъй-ҳаракати билан ушбу бинода жорий ҳафтада таъмирлаш ишларининг биринчи босқич ишларини бошлаш режалаштирилган. Биринчи босқич ишларининг молиявий манбалари ҳал этилиб, таъмирлаш ишлари бошланганда, жараёнлар хусусида тўлиқ маълумот бериб борилади. 

Янгиобод тумани ҳокимлиги

Ахборот хизмати