Xalq deputatlari Yangiobod tuman Kengashining 73-sessiyasi bo'lib o'tdi
Bugun Yangiobod tumani hokimligi majlislar zalida Xalq deputatlari Yangiobod tuman Kengashining navbatdagi 73-sessiyasi boʻlib oʻtdi.
Sessiyada Xalq deputatlari viloyat va tuman Kengashi deputatlari, tuman hokimining oʻrinbosarlari hamda kun tartibidagi masalalarga aloqador tashkilot rahbarlari hamda ommaviy axborot vositalari xodimlari ishtirok etishdi.
Sessiya ishida deputatlar tomonidan kun tartibidagi 5 ta masala ko'rib chiqildi va tegishli qarorlar qabul qilindi.
Sessiya kun tartibidagi 1-masala yuzasidan Xalq deputatlari tuman Kengashi kotibiyati mudiri V.Hasanov so‘zga chiqib, O‘zbekiston Respublikasi Oliy Majlisi Qonunchilik palatasi, xalq deputatlari mahalliy Kengashlari deputatligiga saylov o‘tkazuvchi uchastka saylov komissiyalari a’zoligiga tavsiya etilgan nomzodlar bilan tanishtirdi va deputatlar tomonidan ko'rib chiqildi.
Shundan so'ng sessiya kun tartibidagi 2-masala yuzasidan iqtisodiyot va moliya bo'limi bosh mutaxassisi J.Isroilov so'zga chiqdi va tuman mahalliy byudjetida 2024-yil 2-chorak yakuni bilan shakllangan qo‘shimcha manbalar hisobidan mablag‘ ajratish to'g'risidagi masala deputatlar muhokamasiga tashlandi.
Deputatlar tomonidan ushbu masala atroflicha ko'rib chiqilib, qaror loyihalari tasdiqlandi.
Sessiya kun tartibidagi 3-masala yuzasidan tuman hokimi o'rinbosari, oila va xotin-qizlar bo‘limi boshlig‘i Sh.Rayimovaning Tumanda xotin-qizlarni kasb-hunarga o‘qitish, bandligini ta’minlash, tadbirkorlik faoliyatiga jalb qilish bo‘yicha amalga oshirilgan ishlar to‘g‘risidagi axboroti tinglandi.
Ma'ruzada ta'kidlandiki, xotin-qizlarning tadbirkorlik faoliyatini yo‘lga qo‘yish maqsadida xotin-qizlar tadbirkorligini qo‘llab-quvvatlash markazi tomonidan 100 nafar, Savdo-sanoat palatasi tuman bo‘limi tomonidan 51 nafar xotin-qizlar tadbirkorlik ko‘nikmaliriga o‘qitilib, 58 nafariga 641 mln so‘mlik imtiyozli kreditlar ajratilgan.
Yangi tashkil etilgan tadbirkorlik subyektlariga 121 nafar ish bilan band bo‘lmagan xotin-qizlar jalb etilib, ularning bandligi ta’minlangan. 2024-yil boshida tuman Kambag‘allikni qisqartirish va bandlikka ko‘maklashish bo‘limi bilan hamkorlikda 663 nafar xotin-qizlarni bandligini ta’minlash bo‘yicha dastur imzolangan.
Bugungi kunga qadar 203 nafar xotin-qizlar doimiy ish o‘rinlariga, 834 nafar xotin-qizlar mavsumiy ishlarga, 52 nafar xotin-qizlarni vaqtinchalik jamoat ishlariga jalb qilish orqali bandligi ta’minlangan. Tuman Kambag‘allikni qisqartirish va bandlikka ko‘maklashish bo‘limi tomonidan 86 nafar xotin-qizlar kasb-hunarga o‘qitilgan.
2023-2024-yilda “Ishsiz xotin-qizlarni bandligini taminlash” qo‘shma dasturi ijrosini ta’minlash maqsadida dasturga kiritilgan 143 nafar xotin-qizlardan 116 nafarini bandligi ta’minlangan.
Sessiya kun tartibidagi 4-masala yuzasidan O‘zbekiston Mahallalar uyushmasi Yangiobod tuman bo‘limi boshlig‘i S.Po'latovning mahallaning ijtimoiy-iqtisodiy muammolarini hal etish jamg‘armasi daromadlari va xarajatlari ijrosi to‘g‘risidagi axboroti tinglandi.
Xususan, joriy yilning 8 oyi davomida jismoniy shaxslardan olinadigan mol-mulk va yer solig‘i bo‘yicha undirilgan mablag‘lar hisobidan jami 239,2 mln. so‘m mablag‘lar mahallalarning shaxsiy g‘azna hisobvaraqlariga tushirilganligi, ushbu mablag‘lardan samarali foydalanish bo‘yicha mahallalarda so‘rovnomalar qabul qilinib ijroga yo‘naltirish tashkil etilgani aytildi.
Shuningdek, mahalla fuqarolar yig‘ini tomonidan moddiy texnika bazasini mustahkamlash bo‘yicha taqdim etilgan so‘rovnomalarga asosan 31,3 mln. so‘m mablag‘lar xarajati sarflangani ta'kidlandi.
Shundan so'ng sessiya kun tartibidagi 5-masala yuzasidan tuman maktabgacha va maktab ta’limi bo‘limi boshlig‘i E.Muxtorov 2024-2025 o‘quv yiliga tayyorgarlik ko‘rish bo‘yicha amalga oshirilayotgan ishlar to‘g‘risida axborot berdi.
Ta'kidlandiki, Yangiobod tuman Maktabgacha va maktab ta’limi bo‘limi tomonidan umumta’lim maktablari va maktabgacha ta’lim tashkilotlarida yangi 2024-2025 o‘quv yiliga tayyorgarlik ko‘rish bo‘yicha bir qator ishlar amalga oshirilgan.
Joriy yilda “Fuqarolar tashabbusi” jamg‘armasi mablag‘lari hisobidan 1 mlrd 184 mln 949 ming so‘m mablag‘ hisobiga “Malika-Mohinur Buildings” MCHJ tomonidan 1-umumta’lim maktabining isitish tizimini joriy ta’mirlash, 12-umumta’lim maktabida o‘quvchi sig‘imi ortganligini inobatga olib “Oybek Hamroh” MCHJ tomonidan loyiha qiymati 1 mlrd 197 mln 921 ming so‘mlik maktab hududidan qo‘shimcha 5.90 x 8.53 metr o‘lchamdagi 4 ta sinf xonasi qurish, 2-umumta’lim maktabida 981 mln 890 ming so‘m mablag‘ hisobiga maktabni ta’mirlash va moddiy-texnika bazasini rivojlantirish ishlari amalga oshirilmoqda.
Qolgan umumta’lim maktablarida ham yangi o‘quv yili oldidan joriy ta’mirlash, obodonlashtirish ishlari olib borilib, tayyor holatga keltirilgan.
Sessiya davomida barcha masalalar yuzasidan deputatlarning fikr-mulohazalari tinglanib, tegishli qarorlar qabul qilindi va Xalq deputatlari tuman Kengashining 73-sesaiyasi o‘z ishini yakunladi.
Yangiobod tumani hokimligi
Axborot xizmati
