Бугундан Ўзбекистонда нималар ўзгаради?
1. Енгил автомобилларнинг орқа ён ойналарини қорайтириш бепул бўлди
Президентнинг 28 июндаги [ПҚ-298-сон] қарори билан 1 июлдан бошлаб енгил автотранспорт воситаларининг орқа ён ойналари тусини ўзгартириш (қорайтириш) учун рухсатнома олиш тартиби бекор қилинди.
Жисмоний ва юридик шахсларнинг енгил автотранспорт воситалари олд ён ойналари тусини ўзгартиришга (қорайтиришга) рухсатнома берганлик учун тўлов миқдори БҲМнинг 8 баравари — 2,4 млн сўм этиб белгиланди.
2. Қорақалпоғистоннинг айрим туманларига бориб ишлаган шифокорларнинг маошига 100 ва 200 фоизлик устамалар тўланади
Президентнинг 17 майдаги [ПФ-136-сон] фармонига асосан вилоятлар ҳамда Тошкент шаҳридан, шунингдек, хорижий давлатлардан Қорақалпоғистоннинг Тахтакўпир, Чимбой, Қораўзак, Бўзатов, Шуманай, Қўнғирот туманларига бориб ишловчи шифокорларнинг ойлик лавозим маошига дастлабки уч йил давомида 100 фоиз, Мўйноқ туманида эса 200 фоиз миқдорида қўшимча ҳар ойлик устама тўланади.
Маблағлар Давлат бюджетидан ажратилади. Бунда, мазкур бандда кўрсатилган устамани олиш учун шифокор бошқа ҳудудда камида икки йил ишлаган ҳамда камида иккинчи даражали малака тоифасига эга бўлган бўлиши лозим.
3. Олис ва чекка ҳудудда ишлаётган шифокорларга ипотека кредитининг 50 фоизи қоплаб берилади
Президентнинг 24 апрелдаги [ПҚ-215-сон] қарорига кўра, олис ва чекка ҳудудлардаги оилавий шифокор пунктлари ва оилавий поликлиникаларда фаолият юритаётган барча шифокорлар ойлик иш ҳақига қўшимча 2 миллион сўм миқдорида ҳар ойлик устама тўланади.
Бундан ташқари, уларга ипотека асосида уй-жой сотиб олишда уй-жой қийматининг 50 фоизигача қисми, бироқ БҲМнинг 500 баробари — 150 млн сўмдан ошмаган миқдорда маҳаллий бюджет маблағлари ҳисобидан қоплаб берилади.
4. Барча туман ва шаҳарларда «Хавфсиз йўл» индекси юритилади
Президентнинг 4 апрелдаги [ПҚ-190-сон] қарорига мувофиқ, республиканинг барча туман (шаҳар)лари кесимида «Хавфсиз йўл» индекси юритилади. Бунда:
- индекс доирасида йўл инфратузилмаси ва йўл ҳаракати қоидаларига риоя қилинишининг ҳолати 29 та индикатор бўйича ҳар чорак якунида баҳолаб борилади;
- туман (шаҳар)лар индекс кўрсаткичлари асосида йўлларда ҳаракат хавфсизлигини ташкил этишнинг ҳолати бўйича «яшил», «сариқ» ва «қизил» тоифаларга ажратилади.
5. Давлат музейлари 22:00 гача ишлаши ва пуллик хизмат кўрсатиши мумкин
Президентнинг 25 майдаги [ПҚ-261-сон] қарори билан Ўзбекистондаги давлат музейларига қўйидагиларга рухсат берилмоқда:
- давлат музейларига ҳар куни соат 22:00 гача хизмат кўрсатиш ҳуқуқи берилади;
- заруратга кўра, давлат музейлари тунги иш вақти муддатларини белгилаши мумкин;
- пулли хизматлар кўрсатишда иштирок этган музей ходимларига қўшимча тўловлар тўланади ва улар моддий рағбатлантирилади;
- давлат музейларига фуқаролик-ҳуқуқий шартнома асосида қўшимча ходимларни жалб этишга рухсат берилади.
6. Маҳаллаларда ижтимоий хизматлар комплекс ёндашув асосида кўрсатилади
Президентнинг 29 июндаги [ПҚ-300-сон] қарорига асосан 1 июлдан Маҳаллаларда комплекс ёндашув асосида ижтимоий хизматларни ташкил этиш тизими босқичма-босқич жорий қилинади. Бунинг учун маҳаллаларда комплекс ёндашув тизими асосида ижтимоий хизматларни жорий қилишни мувофиқлаштириш бўйича республика штаби ташкил қилинди.
2022 йил 1 ноябргача маҳаллалардаги хотин-қизлар фаоллари ҳар 2 ҳафтада Ҳудудий штабларга қуйидаги маълумотларни киритади:
- хонадонлар аҳволи, оилаларнинг ижтимоий хизматларга эҳтиёжи;
- оилаларга аниқ ижтимоий хизмат кўрсатиш бўйича маълумотлар;
- мураккаб операцияларга, ногиронларнинг протез-ортопедия буюмларига эҳтиёжи бўйича буюртмалар;
7. Ҳар йили 1 млн нафар фуқаро вирусли гепатит «В» ва «С» турларига скрининг текширувларидан ўтказилади
Президент 16 майдаги [ПҚ-243-сон] қарорига кўра, ҳар йили республика аҳолисини вирусли гепатит «В» ва «С» турларига скрининг текширувлари сони 1 миллион нафаргача, полимераза занжир реакцияси (ПЗР) текширувлари сони 15 минг нафаргача, вирусли гепатит «С» тури билан касалланган беморларни даволаш 10,5 минг нафаргача етказилади.
Вирусология илмий-тадқиқот институтида ҳамда Қорақалпоғистон Республикаси, Навоий, Бухоро, Қашқадарё, Сурхондарё, Жиззах ва Сирдарё вилоятларидаги тегишли муассасаларда Қрим-Конго геморрагик иситмаси билан касалланиб тузалганларнинг (донорларнинг) қон плазмаси банки яратилади.
Нодавлат тиббиёт ташкилотлари қон ва унинг таркибий қисмлари билан ишлаётган ходимлар гепатит «В» инфекциясига қарши эмланади.
Ҳар йили кенг тарқалган вирусли инфекциялар муаммоларининг илмий ечимини таъминлашга қаратилган лойиҳаларга танловлар асосида маблағлар ажратилади.
8. Касаначиликни ташкил этган тадбиркорларга бир марталик субсидия берилади
Президент 21 апрелдаги [ПҚ-214-сон] қарорига мувофиқ, касаначиларга даромад солиғи касаначиликдан олинадиган жами даромадни 50 фоизга, 1 ойда кўпи билан 1 миллион сўмгача камайтирган ҳолда ҳисобланади.
Касаначилар ижтимоий солиқ тўловини ўзини ўзи банд қилган шахслар учун белгиланган тартибда амалга оширади.
Олис ва чекка ҳудудлардаги маҳаллаларда (жами 252 та) касаначиликни ташкил этган тадбиркорларга дастлабки 3 ойдаги фаолияти учун 1 ойлик ўртача даромади миқдорида бир марталик субсидия ажратилади.
9. Бўш турган биноларга нисбатан юқори солиқ ставкасини белгилаш бекор қилинди
Президентнинг 28 июндаги [ПФ-162-сон] фармони билан 1 июлдан бўш турган бинолар, фойдаланилмаётган ишлаб чиқариш майдонлари, яшаш учун мўлжалланмаган иншоотлар, тугалланмаган қурилиш объектларига ва ушбу объектлар билан банд ерларга мол-мулк ва ер солиқларининг оширилган ставкаларини қўллаш, солиқ имтиёзлари ва преференцияларнинг амал қилишини тўхтатиш тартиби бекор қилинди.
Мазкур санадан бошлаб:
- мажбурий равишда қўшилган қиймат солиғи тўловчиси деб эътироф этиладиган тадбиркорларга ҚҚС бўйича гувоҳнома автоматик равишда берилади;
- солиқ хавфи юқори бўлган солиқ тўловчиларнинг ҚҚС бўйича гувоҳномасининг амал қилиши бу ҳақида солиқ органлари томонидан 5 иш куни олдин хабарнома юборилгандан сўнг ҳамда мазкур муддатда камчиликлар бартараф этилмаган тақдирда тўхтатиб турилади.
10. «Оилавий шифокор» йўналиши бўйича мустақил фаолият амалга оширишга рухсат берилади
Президентнинг 27 январдаги [ПФ-60-сон] фармонининг дастурига асосан 1 июлдан «оилавий шифокор» йўналиши бўйича мустақил фаолият амалга оширишга рухсат берилади.
2022 йил 1 июлгача 2022 йилда иқтидорли ўқитувчи ва шифокорларнинг иш ҳақлари малака тоифасига қараб табақалаштирилган ҳолда оширилади. Қолаверса, халқаро экспертлар иштирокида ўқитувчи ва шифокорларга малака тоифаларини бериш тартиби тубдан қайта кўриб чиқилади.
11. Парранда экспорти учун субсидия оширилади
Президент 16 июндаги [ПҚ-281-сон] қарорига кўра, «Паррандасаноат» уюшмасига аъзо паррандачилик хўжаликларига 2024 йил 1 январгача даврда паррандачилик хўжаликларига ҳар бир бош 1 кунлик наслдор жўжани импорт қилиш билан боғлиқ харажатларни қоплаш учун субсидия миқдори 12 минг сўм этиб белгиланди.
Паррандачиликни ривожлантириш бўйича мақсадли давлат дастурлари бўйича кредит маблағлари 10 йилгача муддатга 3 йилгача имтиёзли давр билан ажратилади.