Янгиободда 9 май - "Хотира ва қадрлаш куни"га бағишланган тадбир бўлиб ўтди
Бугун Янгиобод туманидаги Хотира хиёбонида ушбу сана муносабати билан "Хотира бор экан — миллат барҳаёт" шиори остида тадбир ташкил этилди.
Маросим аввалида туман ҳокими И.Қаршибоев барчани қутлуғ сана билан табриклаб, "Хотира ва қадрлаш куни" - ўтган аждодларимизни ёдга олиш, юрт мустақиллиги ва озодлиги йўлида жон берган қаҳрамонларни хотирлаш, иккинчи жаҳон урушида фашизмга қарши курашган ота-боболаримизни эслаш, ҳозирги доруломон кунларга етмоқ учун тинмай меҳнат қилган, қўллари доим дуода бўлган, набиралари даврасида кексалик гаштини сураётган отахону онахонларни эъзозлаш куни эканини таъкидлаб ўтди.
Шундан сўнг туман ҳокимлиги, ҳуқуқни муҳофаза қилувчи органлар ҳамда жамоатчилик вакиллари томонидан "Мотамсаро она" монументи пойига гулчамбарлар қўйилиб, Иккинчи жаҳон урушида ҳалок бўлганлар хотирланди, ўтганлар руҳи ёдга олинди, мустақиллик йилларида хизмат бурчини бажариш чоғида ҳалок бўлган ўғлонлар хотираси олдида ҳурмат бажо келтирилади.
Тадбир давомида бир гуруҳ уруш ва меҳнат фронти фахрийлари ҳамда фахрий (байналминал) жангчиларга туман ҳокими томонидан совға-саломлар улашилди.
Фахрийларимиз дуога қўл очар экан, бугунги тинч ва осойишта кунлар учун такрор-такрор шукрона айтдилар.
Янгиобод тумани ҳокимлиги
Ахборот хизмати