Yangiobodda “Navroʻz” umumxalq bayrami munosabati bilan katta bayram shodiyonasi boʻlib oʻtdi (Video)

Bugun Yangiobod tumanida xalqimizning azaliy qadriyatlarini oʻzida mujassam etgan, yasharish va yangilanish, goʻzallik va nafosat ayyomi boʻlgan “Navroʻz” umumxalq bayrami munosabati bilan katta bayram shodiyonasi boʻlib oʻtdi.

“Olam nurga to'lsin sen bilan, Navro'z!” shiori ostida boʻlib oʻtgan bayram tantanasi avvalida tuman hokimi Ibrohim Qarshiboyev barcha yurtdoshlarimizni bayram bilan tabriklab, yurtimizga tinchlik, xonadonlarimizga toʻkin sochinlik tiladi.

Bayram shodiyonasi davomida tumanimizning xushovoz xonandalari, yosh ijrochilar hamda “Uzumchi” folklor jamoasi tomonidan milliy kuy-qoʻshiqlar va dillarga bahoriy kayfiyat olib kiruvchi koʻngilochar sahna chiqishlari namoyish etildi.

Bayram tadbiri xalq o'yinlari, milliy taomlar va amaliy sanʼat koʻrgazmalari hamda elimiz suygan sanʼatkorlar va soʻz ustalarining chiqishlari bilan yuqori kayfiyatda davom etdi.