Qonunchilikdagi yangiliklarning mazmun-mohiyati
Konstitutsiyaviy sud sudyalarining vakolat muddati oʻzgardi.
Oʻzbekiston Respublikasi Prezidenti tomonidan imzolangan Qonun bilan “Oʻzbekiston Respublikasi Konstitutsiyaviy sudi toʻgʻrisida”gi Qonunga oʻzgartirish va qoʻshimchalar kiritildi.
Unga koʻra, Konstitutsiyaviy sud referendumga chiqarilayotgan masalalarning Konstitutsiyaga muvofiqligi toʻgʻrisida xulosa beradi.
Konstitutsiyaviy sud mazkur toifadagi masalalar boʻyicha tegishli hujjatlar olingan kundan eʼtiboran 15 kundan kechiktirmay qaror qabul qiladi.
Shuningdek, kiritilgan oʻzgartirishga koʻra, Konstitutsiyaviy sudning sudyalari qayta saylanish xuquqisiz 10 yillik muddatga saylanadi.
Fuqarolar oʻz xuquq va manfaatlarini buzayotgan mansabdor shaxslar qarorlari ustidan maʼmuriy sudga murojaat qilganda davlat boji toʻlamaydi.
Oʻzbekiston Respublikasi Prezidenti tomonidan imzolangan Qonun bilan “Davlat boji toʻgʻrisida”gi qonunga oʻzgartirish va qoʻshimchalar kiritildi.
Unga koʻra, jismoniy shaxslar oʻz xuquqlarini va qonuniy manfaatlarini buzayotgan mahalliy davlat hokimiyati organlarining, respublika ijro etuvchi hokimiyati organlarining, maʼmuriy-xuquqiy faoliyatni amalga oshirishga vakolatli boʻlgan boshqa organlarning, fuqarolar oʻzini oʻzi boshqarish organlarining, ular mansabdor shaxslarining qarorlari, harakatlari (harakatsizligi) ustidan sudga murojaat qilganda davlat boji toʻlashdan ozod qilinadi.
Mazkur shaxslarning talablarini qanoatlantirish toʻliq yoki qisman rad etilgan taqdirda, davlat boji shu shaxslardan talablarning qanoatlantirilishi rad etilgan miqdorda mutanosib ravishda undiriladi.
Bunday holatlarda fuqarolardan berilgan arizalar boʻyicha undiriladigan davlat boji BHMning 70 foizi etib belgilandi.
Oʻzbekiston Respublikasining ayrim qonun hujjatlariga respublika ijro etuvchi hokimiyat organlarining nomlarini muvofiqlashtirishga qaratilgan oʻzgartirishlar kiritildi.
Jumladan, Oʻzbekiston Respublikasi Prezidenti tomonidan imzolangan Qonun bilan “Oʻzbekiston Respublikasining ayrim qonun hujjatlariga respublika ijro etuvchi hokimiyat organlarining nomlarini muvofiqlashtirishga qaratilgan oʻzgartirishlar kiritish toʻgʻrisida”gi qonunga oʻzgartirish va qoʻshimchalar kiritildi.
Mazkur Qonun bilan Oʻzbekiston Respublikasining Maʼmuriy javobgarlik toʻgʻrisidagi kodeksiga va boshqa qonunlarga Oʻzbekiston Respublikasining Qishloq xoʻjaligi Vazirligi huzuridagi Veterinariya va chorvachilikni rivojlantirish qoʻmitasining, Oʻsimliklar karantini va himoyasi agentligining hamda Agrosanoat majmui ustidan nazorat qilish inspeksiyasining, Oʻzbekiston Respublikasining Suv xoʻjaligi Vazirligi huzuridagi Suv xoʻjaligi obyektlari xavfsizligini va suvdan foydalanish nazorat qilish inspeksiyasining, shuningdek, Oʻzbekiston Respublikasi Mudofaa Vazirligi huzuridagi Mudofaa sanoati agentligining nomlanishi va vakolatlarini aniqlashtirishni nazarda tutuvchi oʻzgartirishlar kiritildi.
Ushbu Qonun agrar va mudofaa sanoati sohalardagi respublika ijro etuvchi hokimiyat organlarining yaxlit tizimi shakllantirishga xizmat qiladi.
Baxtiyor Mamadaminov,
Jinoyat ishlari boʻyicha
Yangiobod tuman sudining raisi
